අජිත් පැරකුම් ජයසිංහ (Read in English)

ජනාධිපතිත් විපක්ෂ නායකත් එක ම පක්ෂයෙන් පත් වීමේ පදනමින් හිටපු විපක්ෂ නායක සම්බන්ධන් වත්මන් විපක්ෂ නායක පත් වූ අවස්ථාවේදී විරෝධය පළ කළා. දැන් එය විසඳී අවසන් වුණත්, මෙය විශේෂ තත්වයක්. මීට කලින් ද ඉතිහාසයේ මෙය සිදු වී තිබුණත්, එය මේ අන්දමින් ප්‍රශ්න කෙරුණේ නැහැ.

මුලින් ම මෙය සිදු වුණේ 1994දීයි. 1994 අගෝස්තු 12දා පොදු පෙරමුණ නියෝජනය කරමින් ගම්පහ දිස්ත්‍රික් පාර්ලිමේන්තු මන්ත්‍රී චන්ද්‍රිකා බණ්ඩාරනායක කුමාරතුංග අගමැති වන විට රටේ ජනාධිපති වුණේ එක්සත් ජාතික පක්ෂය නියෝජනය කළ ඩිංගිරි බණ්ඩා විජේතුංගයි.

1994 අගෝස්තු 24දා විපක්ෂ නායක ධුරයට පත් එක්සත් ජාතික පක්ෂයේ ගාමිණී දිසානායක 1994 ඔක්තෝබර් 24දා ජනාධිපතිවරණ ප්‍රචාරණ රැළියකදී එල්.ටී.ටී.ඊ. සංවිධානය විසින් ඔහු ඝාතනය කරන තෙක් විපක්ෂ නායක ධුරය හෙබවූවා. ඒ අනුව, ඒ වකවානුවේ ජනාධිපතිත්, විපක්ෂ නායකත් දෙදෙනා ම පත් වුණේ එක ම පක්ෂයකින්.

ජනාධිපතිවරණය ජය ගත් චන්ද්‍රිකා බණ්ඩාරනායක කුමාරතුංග වැඩ භාර ගත්තේ නොවැම්බර් 12දායි. එම වසරේ ඔක්තෝබර් 28දා සිට නොවැම්බර් 12දා දක්වා කාලය තුළ රනිල් වික්‍රමසිංහ විපක්ෂ නායක ධුරය හොබවද්දීත් ජනාධිපතිවරයා එක්සත් ජාතික පක්ෂයේ ම ඩී.බී. විජේතුංගයි.

නැවත වරක් එක ම පක්ෂයෙන් ජනාධිපති හා විපක්ෂ නායක පත් වුණේ 2001 දෙසැම්බර් 18යි. 2002 ජනවාරි 31 දක්වා රත්නසිරි වික්‍රමනායක විපක්ෂ නායක ධුරය හෙබවූයේ තම පක්ෂයේ ම නායිකාව වූ චන්ද්‍රිකා බණ්ඩාරනායක කුමාරතුංග ජනාධිපති ධුරය හොබවද්දීයි.

2002 පෙබරවාරි 6දා සිට 2004 පෙබරවාරි 7දා දක්වා මහින්ද රාජපක්ෂ විපක්ෂ නායක ධුරය දරද්දීත් ජනාධිපති වුණේ ඔහුගේ ම පක්ෂයේ නායිකා චන්ද්‍රිකා බණ්ඩාරනායක කුමාරතුංගයි.

ඒ නිසා එක ම පක්ෂයේ ජනාධිපතිවරයකු සහ අගමැතිවරයකු සිටින එක 1978 ආණ්ඩුක්‍රම ව්‍යවස්ථාව යටතේ ශ්‍රී ලංකාවට අලුත් දෙයක් නෙමෙයි. එය මින් පෙර සිව්වතාවක් සිදු වී තිබෙනවා. දින 1100කට වඩා කාලයක්, එනම්, අවුරුදු තුනක පමණ කාලයක් මේ රටේ ජනාධිපති හා අගමැති යන තනතුරු දෙක ම පක්ෂයකින් හොබවා තිබෙනවා.

(කවරයේ ඡායාරූපය: ගාමිණී දිසානායක සිය බිරිය හා දරුවන් සමග. ඔහු ඝාතනය කිරීමෙන් පසු බිරිය ශ්‍රීමා දිසානායක ජනාධිපතිවරණයට තරග කළා ය. මෙහි ඔවුන්ගේ දරුවන් වන අරුණි, නවීන් හා මයන්ත වෙති. පසුව නම් සඳහන් කළ දෙදෙනා පාර්ලිමේන්තුව නියෝජනය කරති.)