අජිත් පැරකුම් ජයසිංහ
හරි පරිස්සමින් එලු
ජීවිතේ ඇතිරිල්ල
පොඩිවෙලා සුන්දරයි
මාත් ලස්සන වෙලා
කොට්ටයක් බදාගෙන
මුනින් වැතිරී මං
බලා සිටිනෙමි මෙසේ
ඔබ දිහා
පුංචි දරුවකු සේ
ඔබ නිදයි
වෙහෙසකර රාත්‍රියෙ
මිහිරි සුසුමන් හෙළා
කන්දක්ය ළය මඬල
මම ඉඳිමි පාමුල
අතක් ඔබෙ ගත මතින්
නොඑළා
කවුළුවේ සුදු තිරෙන්
සුදු එළිය ගලා එයි
ගේකුරුළු කිචිබිචිය
පිටත බිත්තියෙ ඇසෙයි
මොනරෙකුද හඬලන්නෙ?
කුරුළු කූජන රැසකි
රේඩියෝවක් ඇසේ
ප්‍රවෘත්තිද කොහෙද ඒ
ඒ සියල්ලම නොව
ඔබේ හුස්මය ලොව
ඔබ කවුද මම සිතමි
මා කවුද නොදන්නෙමි
මංගලය උදෑසන
රාත්‍රිය අහවරය
දෙවියනේ මම තවම
නිරුවතින්
2021 පෙබරවාරි 14 ආදරවන්තයන්ගේ දිනය වෙනුවෙනි.
මල් සැරසිල්ල ඊශා කප්පරගේ, ඡායාරූපය අජිත් පැරකුම් ජයසිංහ
