Mahinda Deshapriya

ශ්‍රී ලංකාවේ මේ වන විට නිල කාලය අවසන් වී තිබෙන පළාත් සභා නවය සඳහා නව සභිකයන් තෝරාගැනීමේ මැතිවරණ ජනාධිපතිවරණයට පෙර නොපැවෙත්වෙන බව තහවුරු වෙමින් පවතී. මැතිවරණ කොමිෂන් සභාව විසින් අද දින පුවත්පත්වල පළ කරන ලද දැන්වීමක් මගින් දෙසැම්බර් මස 7දාට පෙර පැවැත්වෙන ජනාධිපතිවරණයක් වෙනුවෙන් තැපෑලෙන් ඡන්ද දැමීමේ සුදුසුකම් ඇති රජයේ සේවකයන්ට දැනුම් දීමක් සිදුකර තිබේ.

Translations by Creative Content Consultants

එම දැන්වීම අනුව ජනාධිපතිවරණයක් කැඳවීමෙන් පසු තැපෑලෙන් ඡන්දය දැමීමට ඉල්ලා සිටීමේදී ප්‍රමාදයන් සිදුවීම වළක්වාගැනීම සඳහා 2018 ඡන්ද හිමි නාමලේඛනයේ පරිපාලන දිස්ත්‍රික්කය, ඡන්ද ප්‍රදේශයේ අක්ෂරය හා නම, ඡන්ද කොට්ඨාසයේ අංකය, ග්‍රාම නිලධාරි කොට්ඨාසය, වීදියේ/ ගමේ නම, ඡන්ද හිමියාගේ සම්පූර්ණ නම, තමන්ගේ නමට අයත් අන්‍රක්‍රමික අංකය සහ ජාතික හැඳුනුම්පත් අංකය යන තොරතුරු සූදානම් කර තබාගන්නා ලෙස ඉල්ලා තිබේ.

කෙසේ වෙතත්, මෙම ජනාධිපතිවරණය සඳහා භාවිතා කරනු ලබන්නේ 2019 ඡන්ද හිමි නාමලේඛනය බව ද මැතිවරණ කොමිෂමේ සභාපතිවරයා දැනුම් දෙයි.

පළාත් සභා ඡන්ද මේ වසර තුළ නොපැවැත්වුවහොත් තමා සභාපති තනතුරින් ඉවත් වන බව මැතිවරණ කොමිසමේ සභාපති මහින්ද දේශප්‍රිය මාස කීපයකට ඉහතදී පැවසී ය.

2017 අගභාගය වන විට ශ්‍රී ලංකා නිදහස් පක්ෂය මැතිවරණයක් ජයගත නොහැකි තත්වයක සිටි හෙයින් මිශ්‍ර සමානුපාතික ක්‍රමයට පළාත් සභා ඡන්දය පැවැත්වීම සඳහා පාර්ලිමේන්තුවේ තුනෙන් දෙකක සහය ඇතිව පනතක් 2017 ඔක්තෝබර් මාසයේදී සම්මත කරගන්නා ලදී. මෙයට එක්සත් ජාතික පක්ෂය, ඒකාබද්ධ විපක්ෂය හා ජනතා විමුක්ති පෙරමුණ ද හේතු විරහිතව සහාය පළ කළ හ.

එම පනත අනුව මැතිවරණ කොට්ඨාස සීමා නිර්ණය කිරීම සඳහා පුද්ගලයන් පස්දෙනෙකුගෙන් යුත් කොමිසමක් පවා පත් කරන ලදී. එම කොමිසමේ වාර්තාව 2018 පෙබරවාරි මාසයේ ඉදිරිපත් කරන ලදී. එය පාර්ලිමේන්තුවේ 2/3ක විශේෂ බහුතර ඡන්දයෙන් සම්මත කළ යුතු වූ මුත් 2018 අගෝස්තු මාසයේදී එම වාර්තාව පාර්ලිමේන්තුවේදී පරාජය විය. එය ඉදිරිපත් කළ එවකට පළාත් සභා හා පළාත් පාලන අමාත්‍ය ෆයිසර් මුස්තාෆා පවා එයට සහාය දැක්වූයේ නැත. වාර්තාවට සහය පළ කරමින් එකදු මන්ත්‍රීවරයකු හෝ ඡන්දය භාවිත නොකළ අතර ඊට විරුද්ධව මන්ත්‍රීවරු 139 දෙනෙක් ඡන්දය දුන් හ.

ඒකාබද්ධ විපක්ෂය මෙන් ම දෙමළ මුස්ලිම් පක්ෂ ද එයට එරෙහි වූ හ. අවසාන ප්‍රතිඵලය ලෙස දැන් පළාත් සභා මැතිවරණ පැවැත්වීමේ හැකියාවක් නැත. එසේ පවත්වන්නට නම් එක්කෝ අලුතින් සීමා නිර්ණය සිදු කර සම්මත කරගත යුතු ය. නැතිනම්, පැරණි ක්‍රමයට ම එය පවත්වන්නට පනතක් සම්මත කරගත යුතු ය. මෙම මොහොත වන විට කිසිදු පක්ෂයක් එයට උනන්දුවක් දක්වන බවක් නොපෙනේ.

Leave comment

Your email address will not be published. Required fields are marked with *.