Kumar Anandan stamps

ලංකාවේ ගිනස් වාර්තා රජු වූ කුමාර් ආනන්දන්

අජිත් පැරකුම් ජයසිංහ

කුමාර් ආනන්දන් යනු 1960, 70 දශකවලදී තරුණ හදවත් කුල්මත් කළ ශ්‍රී ලාංකික වීරයෙක්. මේ ක්‍රීඩාශීලී යෞවනයා ගිනස් වාර්තා කිහිපයක් ම තැබූවෙක්.

Translations by Creative Content Consultants

වෛද්‍ය රුවන් එම්. ජයතුංග ඔහු පිළිබඳ මතකය ෆේස්බුක්හි අවදි කිරීමත් සමග ඔහු ගැන දන්නා බොහෝදෙනෙකු විවිධ කරුණු ගෙනහැර දක්වා තිබුණා.

වසර 1962දී, වයස අවුරුදු 18දී කුමාර් ආනන්දන් පෝක් සමුද්‍ර සන්ධිය හරහා පිහිනුවා. ඔහු එය කළේ ඊට පෙර මුලින්ම එසේ පිහිනා එම වාර්තාව තැබූ ඔහුගේ මාමා වන මුරුගපිල්ලෙයි නවරත්නස්වාමිට ගෞරව පිණිසයි. 1954දී වැල්වැටිතුරෙයි සිට දකුණු ඉන්දියාවේ කැලිමියර් තුඩුවට පිහිනීමට නවරත්නස්වාමිට පැය 28ක් ගතවුණා. ඔහුගේ මෙම වීර ක්‍රියාවට දෙරටේ අගමැතිවරුන් වූ ජෝන් කොතලාවල, ජවහර්ලාල් නේරු වගේ ම එලිසබෙත් රැජිනත් සුබපැතුවා.

1962දී මේ පිහිනීම ම කරන්නට කුමාර් ආනන්දන්ට පැය 42ක් ගතවුණා.

වයස අවුරුදු 27ක් වෙද්දී, 1971දී ඔහු පෝක් සමුද්‍ර සන්ධිය හරහා ඉන්දියාවට පිහිනා ආපසු පැමිණ ගිනස් වාර්තාවක් පිහිටෙව්වා. ඔහුට ඒ වෙනුවෙන් පැය 51ක් ගතවුණා.

කුමාර් ආනන්දන් අපූරු ගිනස් වාර්තා ගණනාවක් ම පිහිටෙව්වා. පැය 128ක් නොකඩවා දඟර නැටුම් නැටීම, සැතපුම් 1487ක් දුරට පැය 187ක් නොනවත්වා බයිසිකල් පැදීම, පැය 187ක් තනි පයින් සිටගෙන සිටීම, විනාඩි දෙකකින් වාඩි වී නැගිටින අභ්‍යාස 165ක් කිරීම පැය 80ක් නොකඩවා වතුරේ ඇවිදීම එම වාර්තායි.

අවසානයේදී ඔහු මියගියේ ඉංග්‍රීසි ඕඩය හරහා පිහිනීමට උත්සාහ දැරීමේදීයි. ඒ 1984 අගෝස්තු 6දායි. එතකොට ඔහුගේ වයස අවුරුදු 40යි.

ලන්ඩන් විශ්වවිද්‍යාලයෙන් අධ්‍යාපනය ලද කුමාර් ආනන්දන් වෘත්තියෙන් නීතිඥයෙක්. ඔහුගේ සම්පූර්ණ නම විවේකානන්දන් සෙල්වකුමාර් ආනන්දන්.  

කුමාර් ආනන්දන් විවාපත් වූ මානෙල් සමරවීර, ඇමති මංගල සමරවීරගේ නැන්දායි. කුමාර් ආනන්දන්ගේ පුත් රාජන් ආනන්දන් අට වසරක් ගූගල් සමාගමේ ගිනිකොණදිග ආසියාවේ සහ ඉන්දියාවේ උප සභාපති ලෙස කටයුතු කළා.

1999දී ශ්‍රී ලංකා රජය කුමාර් ආනන්දන් නමින් තැපැල් මුද්දරයක් නිකුත් කර ඔහුට ගෞරව දැක්වූවා. කුමාර් ආනන්දන් සිහිවීම සඳහා ඔහුගේ ගම වන, ප්‍රභාකරන්ගේ ද ගම වන වැල්වැටිතුරෙයිහි 2019දී ඔහු නමින් පිහිනුම් තටාකයක් විවෘත කෙරුණා.