Poetry by Ajith Perakum Jayasinghe

කියාගන්නට බැරි සිහින

අජිත් පැරකුම් ජයසිංහ

දකින සමහර‍
රසම රසබර
සිහින සිත් තුළ රැව්නැගේ

ගීතයක් සේ
මීවිතක් සේ
සිහිනයෙන් සුවඳක් දැනේ

ඇසේ පතුලේ
ගැඹුරු අඳුරක
ඒ සිහින තැවරී තිබේ

සුළඟකින් කම්පිත තතක් සේ
සිහින රහසින්
හද ගැසේ

මිහිරකුත් අහිමි වූ දුකකුත්
සිහින සිතුවිලි 
මත රැඳේ

රසම රස
සමහර සිහින ගැන
ගොලුව හදවත ඉකිගැසේ

සිහිනයට පමණයි සිහින හිමි
යථාවට
ඇහැරෙමු ප්‍රියේ