barbecue

බාබකියු නිසා මිනිසුන් මැරෙන්නෙ ඇයි?

සීතල මකා ගන්නට බාබකිව් උදුන කාමරයේ තබා ගත් හපුතලේ ඉදල්ගස්හින්න ප‍්‍රදේශයේ ලැගුම්හලක හිමිකරු වන, 60 හැවිරිදි ලෝගනාදන් බාලචන්ද්‍රන් මිය ගියා. ඔහුගේ බිරිඳ සහ සේවිකාවක අසාධ්‍ය තත්ත්වයෙන් දියතලාව මූලික රෝහලට ඇතුළත් කර තිබෙන බව වාර්තා වුණා.

Sinhala Tamil English Translations and Content Writing

මෙම මරණයට හේතුව විෂ වායුවක් බව වාර්තා කර තිබුණත්, බොහෝ දෙනෙකු මෙම මරණයට සැබෑ හේතුව දන්නේ නැහැ. මෙවැනි මරණ මීට පෙරත් ලංකාවේ වාර්තා වී තිබෙනවා. ලෝකයේ මෙවැනි මරණ රැසක් වාර්තා වෙනවා. ඒ නිසා මේ කාරණය දැනගැනීම ඔබ කාටත් වැදගත්.

මේ මරණයට හේතුව කාබන් මොනොක්සයිඩ් වායුව ආඝ්‍රාණය වීමයි. බාබකියු සඳහා යොදාගන්නා ගල් අඟුරු වැනි ඉන්ධන නිසි පරිදි දහනය වීමට අවශ්‍ය ඔක්සිජන් නොලැබුණු කල එයින් කාබන් මොනොක්සයිඩ් වායුව නිකුත් වෙනවා. මෙම උදුන් කාමරයක් තුළට ගත් විට කාමරයේ ඔක්සිජන් අවසන් වී කාබන් මොනොක්සයිඩ් ප්‍රතිශතය ඉහළ යනවා. එළිමහනේදී ඇති තරම් ඔක්සිජන් ඇති නිසා මෙය සිදු වන්නේ නැහැ.

කාබන් මොනොක්සයිඩ් වායුවේ කිසිම ගන්ධයක්, රසයක්, වර්ණයක් නැහැ. ඒ නිසා එය ආඝ්‍රාණය වන බව දැනෙන්නේත් නැහැ. හුස්ම ගැනීමේ අපහසුව, හිසරදය, කරකැවිල්ල, වමනය සහ ඉක්මණින් ම සිහි නැති වීමත් සිදු වෙන්නට පුළුවන්. ඒ නිසා බොහෝ විට මරණය නිහඬව ම සිදු වෙනවා.

බාබකියු කිරීම ඉවර වෙලා වුණත්, උදුන කුටියක් තුළට ගන්නට එපා. එය සම්පූර්ණයෙන් ම නිවෙන තෙක් උදුනෙන් කාබන් මොනොක්සයිඩ් නිකුත් වීමේ අවදානම තිබෙනවා.

ඊශා කප්පරගේ

Call 077 1734470 for Sinhala Tamil English Translations