ආදරණීය පුතාට / දුවට,

ලංකාව හැර ගොසින් ඔය වගේ දියුණු රටක ජීවත් වීම ගැන එක අතකින් මම අම්ම විදියට සතුටු වෙනවා. මමත් පවුලේ අයත් බලන්න අවුරුද්දකට සැරයක් හරි ලංකාවට එන එක වගේම උවමනා එපාකම්වලට මුදල් එවන එක ලොකු දෙයක්.

නමුත් පවුලේ හොඳට ඉගෙන ගත්ත හැකියාවන් තිබුන ඔයාල රට ගියාට පස්සේ පවුලේ වගකීම ගත්තේ නාහට අහන්නේ නැති, කොච්චර පහසුකම් තිබුනත් අධ්‍යාපනයක් නොලබපු ලේසියෙන්ම සල්ලි හොයන්න බලාහිටපු කළු මල්ලිලයි සුදු අක්කලයි. දැන උගත් හොඳ කීපදෙනෙක් ඒ අතර ඉන්නවා. පුදුමේ කියන්නේ එයාලත් දැන් වෙනස්වෙලා.

අපේ සම්ප්‍රදායික මනුස්සකම් දැන් දකින්න නෑ. බුදු බණ පිළිපදින්නේ නෑ.නමුත් ඒ වෙනුවෙන් මරාගන්න යනවා. බුදු පිළිම කඩනවා නිධන් හාරන්න. සමහර හාමුදුරුවරු පිඬු වෙනුවට මුදල් සිඟනවා. හිතාගන්න බෑ කොයි දේද හරි කියල. ඔයාල යන කාලේ වගේ නෙවේ දැන් පාසලේ හැම දෙයම තරඟ. මට හරි අමාරුයි මේ තරඟවලට මුහුණදීලා. සමහරු උගත්කමින් ඉදිමිලා, තවත් සමහරු මෝඩකමින් පිම්බිලා. ඒ පවතින අධ්‍යාපනයේ ප්‍රතිඵල. ඔය දෙකට නැති ගුණ යහපත් අය කම්පාවෙන් ජීවත් වෙනවා. අනාගත පරම්පරාව කාගෙන්ද ආදර්ශය ගන්නේ.
පවුලේ අසරණව ඉන්න කිසිම සහෝදරයෙක් ගැන හිතන්නේ නෑ. වත්තේ පිටියේ කිසිම දෙයක් අලුතින් වවන්නේ නෑ. පිටරටවලින් ගේන කෑම බීම සහ උපාංගෙවලටමයි බර. අර ගොවිතැන් කරන මල්ලිලා හැමදාම දුකින්. කොඩක් බිරින්දෑවෝ මැදපෙරදිග යවල සල්ලි හොයන්න. උන්ගේ දරු පැටව් දස දුක් විඳිනවා. මට දරාගන්න බෑ .

එකාට එකා තරහ කාරයෝ. මට දැන් එපාවෙලා තියෙන්නේ රණ්ඩු වෙනවා දැකල. ලැජ්ජාව නෑ ප්‍රසිද්ධියේ එක එක්කෙනාගේ වැරදි කියනවා. ලෝකයම මේවා දකින එක ගැන අම්ම විදියට මට හරිම ලැජ්ජයි.

පිටරැටියෝ ලාබෙට දෙන විෂ දේවල් ගේනවා වගාවල වල් නහන්න, පොහොර වෙන්න. දැන් රජරට පැත්තේ ඉන්න බොහොමයක් වකුගඩු ලෙඩ්ඩු. උන් මැරෙන දිනය දැනගෙන මැරි මැරී ජීවත්වෙනවා.

ලෝකේ වටේ ඉන්න අපරාධකාරයෝ දෙන මත් ද්‍රව්‍ය බෙදාහරිනව. අහිංසක ළමා පරම්පරාවට ඒවා හුරු කරලා. ඉඩම් කෑලි පිටරටවලට විකුණනවා, බදු දෙනවා. කඳු කපනවා, වනාන්තර පෙන්නන්න බෑ කපනවා පස් ගන්න. විල්පත්තුව ඉවරයි, සිංහරාජෙත් ඔන්න පාරක් කපනවලු. මුන් මාව අනිත්පැත්ත හරවන්න හදනවා.මට මේවා ඉවසන්න බෑ.

පුතේ, හදිස්සියකට ගන්න කිසිම වස්තුවක් නෑ. සේරම විකුණලා. කියන්න දුකයි ළඟදි මහා බැංකුවත් හොරෙන් කැඩුව. ලෝකේ වටේ මුන් ඔය සල්ලි වලින් කරක් ගහනවා. නමුත් ගෙනාපු කිසිම හොඳ ආදර්ශයක් නෑ. ලෝකේ වටේට ණය වෙලා. මට හිතාගන්න බෑ මේ සල්ලි වලට මොකද කරන්නේ කියල.

තව ටික කාලෙකින් පිටරටකින් අපිව යටත් කරගනීද කියල මට බය. මොකද ඔයාල නොදන්නවා උණාට මම දන්නවා තවත් රටකට ජාතියකට යටත් වුනොත් ආයේ කවදාවත් නිදහස් වෙන්න බැරි බව. ඒ වගේම ඒ අතීතය හරිම අමිහිරියි. ඔයාලගේ මුතුන් මිත්තන් ජීවිත දහස් ගණනක් ජාතීන් තුනක් නිසා පුජාකරලා තියනවා ඔවුන් නොදැකපු ඔයාලට මේ රට ඉතිරි කරන්න. ඊට පස්සේ ඔය ප්‍රභාකරන් නිසා රට ගිනිගත්තා. ඒ වෙනුවෙනුත් සියලු ශ්‍රී ලාංකිකයෝ ජීවිත කොයි තරම් නැති උණාද. ත්‍රිවිධ හමුදාවේ සහ පොලීසියේ දරුවෝ ටික ආයෙත් ජීවිත කැපකරලා එය නිවැරදි කළා.

දැන් තියෙන්නේ රට ලෝකය හමුවේ රටක් ලෙස නැගී සිටින්න. ඒ වෙනුවට මුන් කරන්නේ කාකොටා වැටීම.

ඔයාල ඉපදුන දා ඉඳල ලොකුමහත් කරන්න මා ගොඩක් මහන්සි වුණා. ඔයාලගේ ගතට සිතට හානියක් නොවෙන්න මම වග බලාගත්ත. කෑම බීම, බෙහෙත් හේත්, වගේම ඔය වගේ ලෝකයම පිළිගන්න අධ්‍යාපනයක් ලබාදෙන්න මම මොනතරම් කැපකිරීමක් කළාද, අද ඔයාල ලෝකේ කොහේ හරි හොඳින් ඉන්නේ මගේ යුතුකම මා ඉටු කළ නිසා. ඔයාලගේ සුවඳ තියෙන්නේ මා ළඟ. මම දන්නවා ඔයාල මොනතරම් දේවල් ලැබුවත් මව්බිම මතක් වෙනකොට, ළමා කාලය, නෑ හිතවතුන් මතක් වෙනකොට හිතට දුකක් දැනෙනවා කියල. මෙහෙ කෑම බීම විතරක් නෙවේ සුලඟ පවා වටිනා බව. දුක සැප බෙදාගෙන මේ ලස්සන ස්වභාවික පරිසරයේ ඔයාල හැදුන වැඩුන. ඔයාලට දැන් ඔය රටවල ලස්සන දේ පෙනුනට අමතකද මෙහෙ ලස්සන ගංගා ඇලදොළ සහ කඳු සානු. මොන පලතුරද ඔයාලට මෙහෙ නැත්තේ. මොන දේශගුණයද මෙහෙ නැත්තේ. ඔයාල වෙනුවෙන් අතීත මුතුන් මිත්තන් හංගපු රන්කහවණු නිධාන කොයිතරම් තාමත් තියනවද? මුතු මැණික් පොලව යට හංගගෙන ඉන්නේ ඔයාලට.

මාව වෙනත් රටකට යටත් වුවහොත්, ඔය රටවලට වෙලා නිහඬව මල් තියල මාව සමරල වැඩක් නෑ. ඔයාලගේ දරු මුණුපුරන්ට ලෝක සිතියමෙන් මාව පෙන්වල වැඩක් නෑ. දුක්මුසු ඉතිහාස කතාවක් ගොතල වැඩක් නෑ .

ඔයාල උගත්තු. උසස් උපාධි කරපු, විවිධ පරීක්ෂණ නිරීක්ෂණ කරල ලෝකෙට දේවල් දායාද කළ අය. මේ රටම නරකයි කියල වරද පාලකයින්ටම පටවල ඉන්න එපා. කළ හැකි දෙයක් සිතා බලන්න. ඔයාල ලබපු අධ්‍යාපනයේ කොතනද මේ රට නිවැරදි කරන්න හැකියාව තියෙන්නේ බලන්න.

මගේ පපුවේ ඇවිලෙන ගින්දර කියන්න කෙනෙක් නැති නිසා මෙහෙම ලීවේ.පාඩුවේ ඉන්න ඔයාගේ හිත කලබල කරන්න නෙවේ. එවැන්නක් දැනුනානම් මම දුක් වෙනවා.

අවශ්‍යතාවය ඇත්නම් කළ නොහැකි දෙයක් නැති බව විශ්වාස කරන්න.

ඔබ සැමට ජය!

මම ආදරණීය 
අම්මා,
ශ්‍රී ලංකා

Nalika Pushpakumari Kalpage

නාලිකා කල්පගේ විසිනි

Call 077 1734470 for Sinhala Tamil English Translations

Leave comment

Your email address will not be published. Required fields are marked with *.